كمبوش وقطعة الأرض رقم 612كمبوش وقطعة الأرض رقم 612

كل شخص منّا يحلم ويخطط مستقبله، وفي ناس يرسموا خططهم المستقبلية ويحاولوا بقدر المستطاع انهم يمشوا عليها، وهذا اللي عمله كمبوش، كمبوش كان مخطط انه يشتغل ويبني بيت ويتزوج ويشتري سيارة غير اللي عنده، وحقق الهدف الأول وهو الشغل، وجينا على سالفة بناء البيت.

كمبوش: عماد اريدك تساعدني.
أنا: تفضل كمبوش ف ايش أقدر أساعدك؟
كمبوش: أريد أبني بيت وما محصّل أرض زينه أبني عليها.
أنا: وتريدني ادوّرلك؟
كمبوش: هيه إذا ممكن؟ لأني بروح دورة اسبوع خارج عمان واريد لما ارجع اشتري الأرض، بس تكون في مكان حلو و على الشارع ويكون فيها كل الخدمات.
أنا: أفا عليك، بس كم حاط للأرض؟
كمبوش: حاط 10000 ريال.. جمعتهم من راتبي وكنت داخل جمعيه وبستلم الاسبوع القادم.
أنا: خلاص ولا يهمك انا ببتدي من اليوم أدوّر لك.

ابتديت ادوّر على أرض زينه وف مكان زين وبسعر يكون مناسب، لكن المشكله ف ذيك الفترة كانت أسعار الأراضي نار، وكان صعب احد يحصل ارض رخيصه، المهم انا ابتديت ادوّر في الانترنت، قلت يمكن احصل احد عارض أرض زينه ف شي من هالمنتديات، وفعلاً ما خاب ظنّي… حصلت واحد عارض أرض في موقع كثيييييييييير حلو حسب وصفه بس سعرها 13000 ريال، بصراحه شفتها رخيصه على موقعها، رحت أنا واتصلت بصاحب الأرض وقلتله اني أريد أشوفها، إسم الشخص خالد.

أنا: مرحبا أخ خالد… انت عارض أرض في الموقع طالب فيها 13000 ريال؟
خالد: مرحبتين… ايوه اخوي.. ناوي تشتري؟
أنا: والله واحد من ربعي ناوي يشتري بس هو مسافر وبيرجع الاسبوع القادم وهو مخبرني ادوّرله.
خالد: حلو … الأرض موجوده بعد بس لازم تستعجل لأن كم واحد متصلين فيني يريدوها بعد.
أنا: أفا عليك… ممكن أشوفها اليوم؟
خالد: تمام… خلنا نلتقي على الساعه 5 في المنطقة الفلانية.
أنا: بس تم.

إلتقينا في المكان اللي تواعدنا فيه، وراح يوريني الأرض… بصراحة الارض على موقعها تستاهل أكثر من ذاك المبلغ بس ما حبيت أبيّن لـ خالد هالشي علشان ما يتطمّع.

خالد: هاه أخوي . عسى عجبتك الأرض.
أنا: الأرض زينه… بس غالية واجد.
خالد: حرام عليك.. صدقني لو صاحبها ما كان محتاج فلوس ما كان باعها بهالسعر.
أنا: يعني ما انت صاحبها؟
خالد: لأ بس هي مال صاحبي وهو خبرني ابيعها له.
أنا: شوف اخوي خالد صاحبي ما عنده غير 10000 ريال ومستعد يدفعهم كاش السبت القادم، لو تخفّض له يكون زين.
خالد: والله ايش اقولك… ما أعتقد صاحب الأرض بيوافق.
أنا: أنت حاول معه وان شاء الله يوافق.
خالد: صدقني ما راح يوافق… وترى كم واحد متصلين فيه يريدوها بس ترى قلتله لا.. و يصبر لأني بصراحه ما أأمن لأي شخص، في بعضهم يماطلو في الدفع واجد ومال مشاكل.
أنا: لا عاد احنا ما من ذا النوع بس لو تخفض يكون زين.
خالد: خلاص انا بخبر صاحب الأرض وان شاء الله يوافق.
أنا: تمام.

بعد ما افترقنا بنص ساعه اتصل فيني وقال ان صاحب الأرض وافق على 12000 ريال وما يقدر ينزّل أكثر … عاد أنا انتظرت كمبوش لحد ما رجع من السفر ورحت اوريه الأرض.

كمبوش: بصراحه أرض كثير حلوه ومساحتها زينه وموقعها متميز.
أنا: صاحب الأرض ما رضى ينزّل عن الـ 12000 ريال.
كمبوش: بصراحه رخيصة، وما مشكله بتسلّف من عند ابوي 2000 ريال واكملهم على اللي عندي.
أنا: خلاص إذاً خلنا نتصل ف الوسيط.

إتصلنا بـ خالد وخبرناه انّا نريد الأرض، وهو بدوره حددلنا موعد مع صاحب الأرض علشان التنازل واستلام المبلغ.

كمبوش راح وحده يخلص الموضوع، وإلتقينا بعد اسبوع.

أنا: هاه كمبوش عسى تم الموضوع.
كمبوش: هيه الحمد لله صاحب الأرض تنازل عنها واعطيته المبلغ كامل.
أنا: تأكدت من المعلومات مال الأرض مثل رقم القطعه والمكان؟
كمبوش: تأكدت .. رقم القطعة 612 والمربع نفسه وكل الأمور تمام.
أنا: الحمد لله.. طيب الحين ايش باقي؟
كمبوش: الحين باقي تجي البلدية وتوضع علامات للأرض علشان اقدر ابني فيها.
أنا: حلو… وخذيت موعد؟
كمبوش: ايوه… وقالوا بعد شهر.
أنا: ما مشكله .. اعرف واحد هناك ممكن يساعدنا .. انت جهّز نفسك ع الاسبوع القادم.
كمبوش: ما تقصّر والله بتسوي فيني خير.

الأسبوع اللي بعده اتصل فيني كمبوش وصوته متغير.

كمبوش: عماد انته وين؟
أنا: في الدوام .. خير وش فيه؟
كمبوش: انا الحين اكب مع موظفين البلدية رايح الأرض بس الأرض غير عن اللي انت وريتني اياها … لحد الحين ما واصلين ويقولوا انها تبعد عن الشارع بـ 10 كيلو متر وما اي سيارة توصلها وفوق كذا ما فيها اي خدمات.
أنا: كيف كذا! انت ما اشتريت الارض اللي شفناها؟
كمبوش: الظاهر انهم ضحكو علينا.
أنا: لا حول ولا قوة الا بالله… خلني اتصل بـ خالد.
كمبوش: تمام .. اتصل ورد عليّ.

رحت انا واتصلت بـ خالد بس تلفونه كان مغلق واتصلت على مكتبه حسب البطاقة اللي معطني اياها ولما سألتهم قالوا ما عندنا احد اسمه خالد، بعدها اتصلت بكمبوش وخبرته وقال بيجيني بالليل علشان نتفاهم.

وصل كمبوش عندي واتفقنا نروح الشركة اللي مكتوبه في البطاقة مال خالد، وبعد ما سألنا من هنا وهناك وصلنا الشركة لكن قالوا نفس الكلام… ما عندهم شخص اسمه خالد.. جينا نبي نطلع وخيبة الأمل على وجوهنا، طبعاً انا وضعي كان كثير محرج لاني حسيت اني السبب في خديعة كمبوش .. وكمبوش يحس نفسه غبي. المهم واحنا طالعين دخل وليد .. وليد يصير صاحب الأرض الأصلي على طول مسكه كمبوش وطاح فيه.

كمبوش: وليد وين خالد؟
وليد: خالد ما اعرفه وين! ليش جاي تسأل عنه هنا؟
كمبوش: ليش هو ما يداوم هنا؟
وليد: لأ ما يداوم هنا.
كمبوش: طيب انا اريد ترجعلي فلوس الأرض وتشل أرضك ما اريدها.
وليد: لا والله! (بإستهزاء)
كمبوش: يالحرامية انت وخالد كي تبيعوا ارض غير اللي تورونا اياها؟
وليد: حسّن ألفاظك لو سمحت.. وبعدين انا ما وريتك الأرض ولا انت طلبت مني انك تشوفها.
كمبوش: خالد ربيعك وراني ومعطنا هذه البطاقه اللي فيها اسم شركتك.
وليد: طيب تعالوا داخل نتفاهم.
كمبوش: ما بدخل داخل.. باكر اريد اشوفك في الأسكان علشان أتنازل عن الأرض وترجّع فلوسي.
وليد: خلنا ندخل احسن وبنتفاهم.
أنا: كمبوش خلنا ندخل ونشوف ايش عنده.
كمبوش: طيب يالله.

دخلنا عنده المكتب .. اللي اتضح لنا بعدين ان خالد و وليد عصابة في اتفاق ما بينهم على الضحك على الناس بهذه الطريقه، كل شي صح وكمبوش اشترى الأرض رقم 612 ونفس الشي جنبها شارع وعلى الزاوية لكن الفرق هي المنطقة وهذا اللي خلا كمبوش ما يلاحظ انه يشتري ارض غير اللي شافها.

ما خذينا من وليد شي مفيد، طلعنا من عنده بوعود كاذبه لأن بعدين وليد سافر وخالد ما عرفنا له طريق، كمبوش رفع قضية على وليد والحين الإجراءات قائمة.

القانون لا يحمي المغفلين، وما اقول عن كمبوش انه كان مغفّل لكن المحمكه بتشوف انه كذا لانه ما تأكد من المنطقة الله يعلم وش بيكون الحكم، بس لازم نتأكد من الأوراق اللي بنوقّع عليها ولا نكون عرضه للنصّابين، ولازم بعد ما نثق بأي شخص وخاصه اذا كان ما في معرفه سابقه فيه، قد ينعرض عليك اشياء للبيع في اي منتدى او موقع بس لازم تتأكد انت البائع قبل ما تشتري.

أتمنى التوفيق للجميع

جميع الحقوق محفوظة لدى eOman.me

3 thoughts on “كمبوش وقطعة الأرض رقم 612”

  1. يقول Kris:

    BION I’m imrspeesd! Cool post!

اترك تعليقاً

لن يتم نشر عنوان بريدك الإلكتروني.