الوصال – كمبوش – الإستإذآنالوصال – كمبوش – الإستإذآن

مقدمة: كمبوش إنسان عادي جدا قد يكون زميلك أو رئيسك في العمل أو ممكن يكون صديقك أو شخص قريب منك تشوف فيه طبع نسرده لك في سيناريو ونحاول من خلالك ايجاد حل للسلبيات الموجوده فيه ونحاول بعد توضيح نظرة الاخرين لهذه السلبيات.

كمبوش اليوم يستـأذن كثير من الدوام وطبعاً عنده عذر لكل إستإذان بعض الأعذار حقيقية وكثير منها يختلقها بنفسه، وكثرة أعذاره فـ شي طبيعي إن بعض الاعذار تتكرر مثل اإه مريض او ولده مريض، لكن الغريبة إن في أعذار مستحيل اإها تتكرر ،لكن عند كمبوش كل يصير، فمثلاً خذ إجازة بسبب وفاة جدته لحد الحين أربع مرات، مع العلم إنها أصلاً متوفيه لما كان عمره 5 سنوات، لكن في ذيك الفترة كان ما تحق له الإجازه علشان كذا قرر يعوضها لما يداوم ولحسن حظه ان مسؤوله تغيّر مرتين، فالإجازة في هذه الحالة تتضاعف.

قام كمبوش اليوم الصباح متضايق ماله مزاج يداوم، لكن وش يسوي ما باليد حيلة، شرب الشاي في البيت وطلع على دوامه، وبعد ساعتين من وصوله الدوام إتصل فيه واحد من اهله، وخبره ان أحد من جيرانهم توفى، على طول كمبوش قام عند المدير علشان يستأذن.

كمبوش: استاذ انا استأذنك بروح، حد من أقاربنا توفى.
المدير: لا حول ولا قوة الا بالله، يحزن الله عزاك كمبوش.
كمبوش: لله البقاء والدوام.
المدير: وش يصيرلك اللي توفى؟
كمبوش: يصير ولد عم خالة ابوي، لكن متربيين مع بعض وقريب مني واجد.
المدير: ما عليه روح ونلتقي باكر إن شاء الله.

مع ان المدير ما مقتنع بعذر كمبوش الا انه ما رفض طلبه لانه ما يريد يجبر الموظف يداوم غصب عنه.

طلع كمبوش من الدوام، لكن بدل ما يروح العزا راح عند السوبر ماركت يشتري إغراض للبيت وبعدها رجع البيت يشوف التلفزيون، ما ادري ليش احس كمبوش بيسوي مثل سالفة الراعي والذيب 🙂 .

أسئلة المناقشة:
* هل صادفت مثل هذه الشخصية؟
* هل كثير الاستإذان ممكن يأثر على مصداقية الشخص؟ (بمعنى ان الا الموظف يستأذن كثير ممكن وصل لحد ان الإدارة ما تقدّر ظروفه)
* ايش الاسباب اللي تخلي الموظف يختلق اسباب للإستإذان؟

تم كتابة هذه القصة لقناة الوصال (البرنامج الصباحي) تقديم المذيع المتألق خالد الراشدي

3 thoughts on “الوصال – كمبوش – الإستإذآن”

  1. يقول Lanette:

    Mighty useful. Make no misatke, I appreciate it.

اترك تعليقاً

لن يتم نشر عنوان بريدك الإلكتروني.