كمبوش و الحب – ج1كمبوش و الحب – ج1

كل الناس تقريبا مرّوا بلحظات حب، وعاشوا ايام جميلة مع الحب، وأكيد كمبوش له تجربه مع الحب.

كان كمبوش مدمن على الانترنت ومواقع الدردشة، وكل ما اتصل فيه نريد نطلع يقول لي اليوم عندي موعد في النت! كنت ما اعرف ايش هذا الموعد وايش اللي يصير في النت إلا لما رحت عنده البيت وشفت واحد من مواعيده.

كمبوش: شوف عماد، انا لما ادخل هذا الموقع احصل ناس يتكلموا وكل احد يشوف الكلام ويصير مثل الدردشه بيننا.
أنا: الحين هذا الموعد اللي تتكلم عنه!
كمبوش: اصبر شوي، لا تستعجل خلني اشرحلك.
أنا: أوكي اشرح.
كمبوش: أي واحد من هذيلا اقدر اكلمة كلام خاص بيني وبينه وماحد يقدر يشوف، وانا لما يصير عندي موعد اكون مواعد وحده تدخل في نفس الوقت اللي ادخل فيه علشان نسولف مع بعض.
أنا: اهاااا والله طريقه حلوه و أوفر من التلفون.

في هذه اللحظه ظهر اطار في الكمبيوتر ومكتوب فوق “الملاك” وتحت “السلام عليك كمبوش”

أنا: ايش هذا؟
كمبوش: هذا الموعد.. الحين نبدأ نتكلم ونسولف انا وهذه.
أنا: ومن هي هذه؟
كمبوش: ما اعرف اسمها بس لقبها “الملاك”.
أنا: طيب كيف عرفت انها بنت؟
كمبوش: هي قالت!
أنا: طيب ايش يظمن لك انها فعلاً بنت.
كمبوش: شوف عماد… انا ما اريد منها شي .. سواء بنت او ولد في النهاية سوالف.
أنا: والله شي حلو و مسلّي.
كمبوش: هيه وانا احب كثير اسولف واضحك مع هالبنت، شكلها طيبه.

جلس كمبوش يسولف ويضحك وينكّت معها، ويمكن هو هذا الشي اللي دفعها انها تطلب رقمه تلفونه، المهم الرجّال على طول كتب رقمه، وانتظر الاتصال. هذاالشي صار في فترة العصر..
بالليل طلعنا انا وهو و واحد من ربعنا نتعشى في مطعم، وأثناء انتظارنا للعشا جاء الاتصال المنتظر.

كمبوش: مرحبا (بصوت جادّ)
الملاك: مرحبيتن
كمبوش: هلا والله بالملاك
الملاك: ما شاء الله كيف عرفت!؟
كمبوش: لاني انتظر اتصالك ومافي اصلاً بنات يتصلوا فيني (همممممممممم اعتقد يكذب 🙂 )
الملاك: اهاااا.. المهم بس حبيت اسمع صوتك ولا تحاول تتصل على هالرقم لانه مال اخوي.
كمبوش: أشكرك على ثقتك فيني، وان شاء الله اكون عند حسن ظنك (اوييييييييييين)
الملاك: يالله تصبح على خير
كمبوش: وانتي من اهله .. مع السلامه

بعد هذا الاتصال كان في اتصال ثاني في نفس اليوم بس في وقت متأخر، وفي اليوم الثاني خبّرني كمبوش عن الاتصالات وانه عرف اسمها ومعلومات عنها وان في لقاء بيصير بينهم.

أنا ما شفت كمبوش الا بعد اسبوع.

أنا: هاه كمبوش كيف وش صار مع البنت
كمبوش: ماشي الأمور تمام.. إلتقينا و وضحتلها اننا نظل اخوه وما تزيد او تطور العلاق لأكثر من كذا.
أنا: أحسن لك عن المشاكل.
كمبوش: ترى كذا.

إستمر كمبوش في علاقته مع البنت و أنا ما صرت اسأله عنها لان الموضوع ما كان يهمني في ذاك الوقت، لحد ما جا كمبوش في يوم يشتكيلي وخبرني عن اللي صار بينهم.

الملاك: كمبوش انا آسفه لاني خنت العهد اللي بيننا.
كمبوش: أي عهد ملاك.. احنا مافي بيننا عهود!
الملاك: احنا اتفقنا تظل علاقتنا اخوه وما تطور العلاقه اكثر من كذا.
كمبوش: ايوه صح وانا ملتزم بهذا الشي.
الملاك: طيب أنا ما إلتزمت وصرت اعتبرك غير… كمبوش انا “أحبك”.
كمبوش: الملاك بس احنا متفقين.
الملاك: انا آسفه بس ما ادري وش صار فيني (وعيونها تذرف دمع)
كمبوش: طيب الملاك انا أخذت عهد على نفسي اني ما ادخل في معمعة الحب الا مع اللي بتزوجها وانا بصراحه ما اريد اتزوجك.
الملاك: وانا ما طلبت منك الزواج!
كمبوش: عيل ليش نحب بعض!
الملاك: انا ما اقدر اتحكم بمشاعري او اضغط زر و اغير شعوري تجاهك.. أنا حبيتك وهذا غصب عني وما اريد منك زواج بس اريدك تقدر شعوري.

بعد ما خبرني كمبوش هالسالفه، صار عندي فضول اعرف هو ايش يحس، كمبوش فعلاً ما كان يحس بشئ تجاهها وهي اللي كانت تحاول معاه، وفي يوم كانو طالعين مع بعض في السياره وتقربت هي منه وبدأت تبادله الـ….

يتبع….

30 thoughts on “كمبوش و الحب – ج1”

  1. يقول صديقك المجنون:

    متابعين عماد

    سرد جميل وحلو والتشويق موجود

    ها متى الجزء الثاني

  2. يقول admin:

    أشكرك على المتابعه يا صديقي المجنون

    قريب ان شاء الله 😉

  3. يقول زهورالأمل:

    نحن بإنتظار الجزء2
    بالفعل شوقتنا

  4. يقول خنجرة:

    طريقة سردك ممتعة جدا الى الامام ..تخلينى وانا اقرء اتخيييييل .. اموت واعرف كيف عسكور بيتعامل معاها ؟؟؟؟..لا تطول علينا الانتظار صعب ..خخخخ

  5. يقول awrad:

    ‎The Hardest Thing

    God with him

  6. يقول admin:

    زهور الامل , خنجرة و اورارد

    أشكركم على المتابعة والجديد قادم بإذن الله

  7. يقول زهورالأمل:

    يا خسارة كان عاجبني إسم عسكور
    بصراحة الإسم يلعب دور في شد إنتباهك..
    لاتطول علينا تراني متابعة معك في كل جديد
    تحياتي لك يا عماد

  8. يقول admin:

    حتى انا كان عاجبني اسم عسكور لكن استوجب عليّ التغيير بسبب التشابه في الأسماء… وان شاء الله الاسم الجديد ما يكون في احد مثله وبتواصلكم ورودكم ينتشر الاسم ويكون له صدى.

  9. يقول الوهم:

    ومن الحب ما قتل

    قصه ممتعه 🙂

  10. يقول Cayden:

    Too many compliments too little space, thnkas!

اترك تعليقاً

لن يتم نشر عنوان بريدك الإلكتروني.